Friday, March 28, 2014

మేఘంలో నిద్దుర పోయిన... రంగులు అన్నీ రప్పించి మాగాణి ముంగిట పెట్టే ముగ్గే ప్రేమంటే!

ఆకాశం తాకేలా వడ గాలై ఈ నేల
అందించే ఆహ్వనం ప్రేమంటే...
ఆరాటం తీరేలా బదులిచ్చే గగనంలా
వినిపించే తడి గానం ప్రేమంటే...
అణువణువును మీటే మమతల మౌనం
పదపదమంటే నిలవదు ప్రాణం
ఆ పరుగే ప్రణయానికి శ్రీకారం!
దాహంలో మునిగిన చివురుకి... చల్లని తన చెయ్యందించి
స్నేహం తో మొలకెత్తించే చినుకే ప్రేమంటే!
మేఘంలో నిద్దుర పోయిన... రంగులు అన్నీ రప్పించి
మాగాణి ముంగిట పెట్టే ముగ్గే ప్రేమంటే!

ఘల్ ఘల్...

ప్రాణం ఎపుడు మొదలైందో...
తెలుపగల తేదీ ఏదో గుర్తించేందుకు వీలుందా
ప్రణయం ఎవరి హౄదయంలో...
ఎపుడు ఉదయిస్తుందో గమనించే సమయం ఉంటుందా
ప్రేమంటే ఏమంటే చెప్పేసే మాటుంటే
ఆ మాటకు తెలిసేనా ప్రేమంటే!
అది చరితలు సైతం చదవని వైనం
కవితలు సైతం పలకని భావం
సరిగమలెరుగని మధురిమ ప్రేమంటే!
దరి దాటి ఉరకలు వేసే యే నదికైనా తెలిసిందా
తనలో ఈ ఉరవడి పెంచిన తొలిచినుకేదంటే!
సిరి  పైరై ఎగిరే వరకు చేనుకు మాత్రం తెలిసిందా
తనలో కనిపించే కళలకు తొలి పిలుపేదంటే!

ఘల్ ఘల్...

మండే కొలిమినడగందే...
తెలియదే మన్ను కాదు ఇది స్వర్ణమంటు చూపాలంటే
పండే పొలము చెబుతుందే...
పదునుగా నాటే నాగలి పోటే చేసిన మేలంటే
తనువంతా విరబూసే గాయాలే వరమాలై
దరి చేరే ప్రియురాలే గెలుపంటే!
తను కొలువై ఉండే విలువే ఉంటే
అలాంటి మనసుకి తనంత తానే
అడగక దొరికే వరమే వలపంటే!
జన్మంతా నీ అడుగుల్లో అడుగులు కలిపే జత ఉంటే
నడకల్లో తడబాటైనా నాట్యం అయిపోదా!
రేయంతా నీ తలపులతో ఎర్రబడే కన్నులు ఉంటే
ఆ కాంతే నువ్వెతికే సంక్రాంతై ఎదురవదా!

***

చిత్రం: నువ్వొస్తానంటే నేనొద్దంటానా
గానం: S P బాలసుబ్రమణ్యం
రచన: సిరివెన్నెల సీతారామ శాస్త్రి
సంగీతం: దేవి శ్రీ ప్రసాద్ 

Tuesday, February 11, 2014

నింగీ నేల ఏకంకాగా... ఈ క్షణమిలాగె ఆగింది...

ఈనాడే ఏదో అయ్యింది... ఏనాడూ నాలో జరగంది...
ఈ అనుభవం మరలా రానిది...
ఆనంద రాగం మోగింది... అందాల లోకం రమ్మంది
ఈనాడే ఏదో అయ్యింది... ఏనాడూ నాలో జరగంది...

నింగీ నేల ఏకంకాగా... ఈ క్షణమిలాగె ఆగింది
నింగీ నేల ఏకంకాగా... ఈ క్షణమిలాగె ఆగింది
ఒకటే మాటన్నదీ... ఒకటైపొమ్మన్నదీ
మనసే ఇమ్మన్నదీ... అది నా సొమ్మన్నదీ
పరువాలు మీటి... సెలయేటి తోటి...
పాడాలి నేడు... కావాలి తోడు

ఈనాడే ఏదో అయ్యింది... ఏనాడూ నాలో జరగంది...

సూర్యుని మాపి... చంద్రుని ఆపి... వెన్నెల రోజంతా కాచింది
సూర్యుని మాపి... చంద్రుని ఆపి... వెన్నెల రోజంతా కాచింది
పగలూ రేయన్నదీ... అసలే లేదన్నదీ
కలలే వద్దన్నదీ... నిజమే కమ్మన్నదీ
ఎదలోని ఆశ... ఎదగాలి బాసై
కలవాలి నీవు... కరగాలి నేను

ఈనాడే ఏదో అయ్యింది... ఏనాడూ నాలో జరగంది...
ఈ అనుభవం మరలా రానిది...
ఆనంద రాగం మోగింది... అందాల లోకం రమ్మంది
ఈనాడే ఏదో అయ్యింది... ఏనాడూ నాలో జరగంది...

***

చిత్రం: ప్రేమ
గానం: S P బాలసుబ్రమణ్యం, చిత్ర
రచన: వేటూరి
సంగీతం: ఇళయరాజా